गोरखा । असोज १२ गते आएको बाढीले त्रिशुली नदी माथि रहेको झोलुङ्गे पुल बगाएपछी गोरखाका केही गाउँका बासिन्दालाई समस्या हुन थालेको छ ।
बाढीले शहिद लखन गाउँपालिका–४ ठेउवाटार र आसपासका क्षेत्रका बासिनलाई दैनिक आउजाउमा समस्या भएको हो ।
असोज १२ गते त्रिशुली नदीमा आएको बाढीले गोरखाको ठेउवाटार र चितवनको इच्छाकामना गाउँपालिका–४ कुरिनटार जोड्ने झोलुङ्गे पुल बगाएपछी दैनिक रुपमा पुलको प्रयोग गरेर आउजाउ गर्न समस्या भएको शहिद लखन गाउँपालिका वडा नम्बर ४ का वडाध्यक्ष यामबहादुर थापाले बताए ।
उनका अनुसार ठेउवाटार संगै रहेको अर्को गाउँको झोलुङ्गे पुलमा समेत बाढीले असर गरेपछी अहिले अधिकांश गाउँले समस्यामा परेका छन् । ‘चाढबाडको यो बाहिर भएकाहरु गाउँ आउछन्’ उनले भने ‘दैनिक उपभोग्य सामाग्री खरिद गर्न समेत समस्या भएको छ ।’
स्थानियले जोखिम मोलेरै बाढीले क्षति पुर्याएको झोलुङ्गे पुल प्रयोग गरीरहेका छन् । त्यस्तो पुलबाट हिडढुल गर्दा पनि ज्यानको जोखिम रहने वडाध्यक्ष थापाले बताए ।
उनका अनुसार बाढीले क्षति पुर्याएको पुल तत्कालै मर्मत हुनेमा पनि शंका गरे । ठेउवाटार, करङबगर, माथिल्लो ठेउवाटार, तेर्से र बाहुनथोक लगायतका अन्य गाउँका बासिन्दाले सहज रुपमा त्रिशुली नदी तरेर कुरिनटारसम्म पुग्ने कुनै उपाय नएकाले पनि ज्यान जोखिममा नै राखेर सोही पुलको प्रयाग गर्न स्थानिय बाध्य भएको उनले बताए ।
उक्त झोलुङ्गे पुल भएर करिब २०० घर परिवारले दैनिक रुपमा चितवनको कुरिनटार आउजाउ गर्दैै आएका थिए । पुल नहुदा स्थानिय सहित बिद्यार्थीहरु स्कुल तथा कलेज र किसानले आफ्नो उत्पादन बजारसम्म लान समस्या भएको छ ।
