गोरखा । गोरखामा ठाडो खोलाले बगाएर ज्यान गुमाउने परिवारलाई आर्थिक सहयोग हस्तान्तरण गरीएको छ । शहिद लखन गाउँपालिका–६ घैरुङस्थित अधेरीकी ७० वर्षीया बालकुमारी श्रेष्ठको परिवारलाई आर्थिक सहयोग प्रदान गरीएको हो ।
जिल्ला प्रशासन कार्यालय गोरखाले विपद् व्यवस्थापन कोषबाट पीडित परिवारलाई २ लाख ५० हजार राहत स्वरुप उपलब्ध गराएको प्रमुख जिल्ला अधिकारी भोला दाहालले बताए ।
प्रजिअ दाहालका अनुसार मृतकको परिवारलाई सङ्घीय सरकारबाट प्राप्त २ लाख र प्रदेश सरकारबाट प्राप्त ५० हजार गरी कुल २ लाख ५० हजार मृत्तककी छोरीलाई हस्तान्तरण गरिएको हो ।
यही असोज १२ गते बुङकोट स्वास्थ्यचौकीमा उपचार गरेर घर फर्कने क्रममा गाउँपालिका–६ र ७ को सिमानामा पर्ने सुकौरा खोलाले बगाएर श्रेष्ठको ज्यान गएको थियो ।
