गोरखा । सहिद लखन गाउँपालिकाले पालिका भित्रका अपाङ्गता भएका व्यक्तिलाई घरघरमै पुगेर परिचय वितरण तथा नवीकरण गर्न थालेकाे छ । गाउँपालिकाले त्यस्ता व्यक्तिको सहजताका लागि चिकित्सक, कर्मचारी र जनप्रतिनिधिहरु परिचालन गरी परिचय पत्र वितरण तथा नवीकरण गर्न थालेकाे हाे ।
पालिकाबाट दिने सेवा र सुविधा अपाङ्गता भएकाले पनि पाउन भन्ने उद्देस्य गाउँपालिकाको भएकाे गाउँपालिकाकी उपाध्यक्ष इन्दिरा तिवारीले बताए । उनका अनुसार पालिकाले चिकित्सक र आवश्यक जनशक्ति परिचालन गरेर त्यस्ता व्यक्तिका घरघरमा पुगेर सवै प्रक्रिया पूरा गरी परिचय पत्र वितरण र नविकरण गर्न थालेकाे हो ।
परिचय पत्र वितरणका लागि गोरखा अस्पतालका मेडिकल अफिसर सन्तोष सिटौलासहित गाउँपालिकाका स्वास्थ्य शाखाका प्रमुख विरेन्द्र श्रेष्ठलगायतको टोली घरघरमा पुगेका छन् । ‘‘अपाङ्गता परिचय पत्र दिन मेडिकल रिर्पोट अनिवार्य हुन्छ, उपाध्यक्ष तिवारीले भने, ‘‘त्यसका लागि चिकित्सक समेत घरघरमै पठाइएको हो । ’’
अभियानका क्रममा अहिलेसम्म २३३ जनालाई सेवा प्रदान गरिएको उनले बताए । अभियानमा ९ जनालाई नयाँ परिचयपत्र वितरण गरिएको छ भने २२४ जनाको परिचय पत्र नवीकरण गरिएको छ ।
पालिकाकाे वडा नम्बर २, ४, ५, ६, ८ र ९ मा रहेकाहरुलाइ नयाँ परिचय पत्र वितरण गरिएकाे उनले बताए । पालिकाले यहीँ भदौ २० गतेदेखि २४ गतेसम्म घर घरमा पुगेर अपांगता परिचय पत्र वितरण तथा नवीकरणको काम सम्पन्न गरेको हो ।
घरमै परिचयपत्र पाउदा र नवीकरण हुदा लाभग्राही खुशी भएका छन् ।