गोरखा । गोरखा जिल्लामा २ महिना नपुग्दै डेंगु र स्क्रब टाईफसका ५५७ जना बिरामी परेका छन् । गोरखाको ९ स्थानिय तहमा ५५७ जना संक्रमित फेला परेको स्वास्थ्य कार्यालय गोरखाका महामारी फोकल पर्सन तथा ल्याब टेक्निसियन नारायणबावु अर्यालले जानकारी दिए ।
उनका अनुसार सबैभन्दा धेरै संक्रमित गोरखा नगरपालिकामा फेला परेका छन् । डेंगुका २४१ जना र स्क्रब टाईफसका ९० जना संक्रमित गोरखा नगरपालिका भित्र रहेको उनले बताए । यो संख्या अझै धेरै हुन सक्ने उनको अनुमान छ ।
फोकल पर्सन अर्यालका अनुसार जिल्ला बाहिर उपचार गराउन गएकाहरुको रेकर्ड कार्यालयमा नहुने भएका कारण संक्रमितको संख्या धेरै भएको अनुमान गरिएको हो ।
संक्रमण देखिएका मध्ये दोस्रो स्थानमा आरुघाट गाउँपालिका देखिएको छ । कार्यालयले उपलब्ध गराएको तथ्यांक अनुसार आरुघाट गाउँपालिकामा ४७ जना डेंगु र ७३ जना स्क्रब टाईफसका बिरामी छन् ।
त्यस्तैगरी, पालुङटार नगरपालिकामा ४६ जनामा डेंगु र २७ जनामा स्क्रब टाईफस देखिएको छ । शहिद लखन गाउँपालिकामा १२ जना डेंगु र ३ जनामा स्क्रब टाईफस देखिएको कार्यालयको रेकर्डमा रहेको छ ।
उता बारपाक सुलिकोटमा ३ जना र गण्डकी तथा अजिरकोटमा २–२ जनामा डेंगुको संक्रमण देखिएको छ ।
संक्रमण देखिएको मध्ये सिरानचोक र भिमसेन थापा गाउँपालिकमा क्रमश.८ र ३ जनामा स्क्रब टाईफस देखिएको पनि फोकल पर्सन अर्यालले जानकारी दिए ।
जिल्ला भित्र भिमसेन थापा, सिरानचोक, धार्चे र चुम नुब्री गाउँपालिकामा डेंगुका शून्य संक्रमित रहेका छन भने अजिरकोट, गण्डकी, बारपाक सुलिकोट, धार्चे र चुम नुब्री गाउँपालिमा स्क्रब टाईफसका बिरामी शून्य रहेका छन् ।
उत्तरी गोरखाको धार्चे र चुम नुब्री गाउँपालिकामा दुवै संक्रमणको कुनै पनि बिरामी हालसम्म फेला नपरेको फोकल पर्सन अर्यालले बताए ।
