गोरखा । जिल्ला प्रशासन कार्यालय गोरखाले १ बर्षमा करिब १७ हजार जनालाई नागरिकताको परिचय पत्र बितरण गरेको छ । कार्यालयबाट बितरण हुने विभिन्न ५ प्रकारका १६ हजार ५४१ जनालाई बिरतण गरेको प्रमुख जिल्ला अधिकारी भोला दाहालले बताए ।
कार्यालयले वंशजको आधारमा बितरण हुने नागरिकताका साथै बैवाहिक अंगीकृत, आमाको नामबाट पाउने नागरिकता, गैर आवासीय र नागरिकता प्रतिलिपी सहित गरी गएको आर्थिक बर्षमा उक्त संख्याका मानिसहरुलाई बितरण गरेको हो ।
प्रजिअ दाहालले दिएको जानकारी अनुसार सबैभन्दा धेरै वंशजको आधारमा पाउने नागरिकता वितरण भएको छ । आर्थिक बर्ष २०८०–०८१ मा त्यस्ता प्रकारका नागरिकता दिनेको संख्या ८ हजार ३५९ जना रहेका थिए ।
त्यसका साथै नागरिकताको प्रतिलिपी पनि सोही आधारमा ८ हजार १०५ जनाले लिएको कार्यालयको तथ्यांकमा उल्लेख गरिएको छ । प्राप्त तथ्यांक अनुसार गएको आर्थिक बर्षको पहिलो चौमासिकमा बंशजको आधारमा १ हजार ४९७ जना, दोस्रो चौमासिकमा २ हजार ८४ जना, तेस्रो चौमासिकमा १ हजार ७१७ जना र चौथो चौमासिकमा ३ हजार ६१ जनाले नागरिकता लिएका थिए ।
त्यस्तैगरी, नागरिकताको प्रतिलिपी लिनेहरुमा पहिलो चौमासिकमा १ हजार ८ ६९ जना, दोस्रो चौमासिकमा १ हजार ९०९ जना, तेस्रो चौमासिकमा २ हजार ७१ जना र चौथो चौमासिकमा २ हजार २५६ जनाले लिएको कार्यालयले जानकारी दिएको छ ।
कार्यालयबाट बितरण हुने बैवाहिक अंगीकृत नागरिकता लिनेको संख्या ८ जना रहेको छ भने १३ जनाले आमाको नामबाट नागरिकता बनाए र ५६ जनाले गैर आवासीय नागरिकताको सुविधा लिएको पनि प्रजिअ दाहालले जानकारी दिए ।
सोही अवधिमा वंशजको आधारमा ४ हजार ४२३ जना महिला र ३ हजार ९३६ जना पुरुषले नागरिकता लिएका थिए भने ३ हजार ६७० जना महिला र ४ हजार ४३५ जना पुरुषले प्रतिलिपी नागरिकता लिएका थिए ।
