गोरखा । गोरखा प्रहरीले लाश उत्खनन गरी अनुसन्धान प्रकृया अगाडी बढाएको छ । दुई साता अगाडी गोरखाको भण्डारी गाउँमा मृत्यु भएकी ४५ बर्षिया रनमायाँ गुरुङको शव उत्खनन गरी अनुसन्धान सुरु गरेको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी रमेशकुमार श्रेष्ठले जानकारी दिए ।
उनका अनुसार बारपाक सुलिकोट गाउँपालिका–४ सौरपानीको भण्डारी गाउँ बस्ने बर्ष ४६ को मारज गुरुङको श्रीमती बर्ष ४५ की रन माया गुरुङको गएको ४ गते शुक्रबार राती १० बजे घर भित्र झुण्डि मृत्यु भएको भनि निजै मारज गुरुङले स्थानीयहरु समेतलाई भेलापारी त्यसको भोली पल्ट साउन ५ गते आफ्नो जातीय परम्परा अनुसार मृतकको शव जमिनमा गाडी सदगत गरेका थिए ।
घटना पश्चात उक्त घटना शंकास्पद रहेको भन्दै मृतकको दाजु सुकपाल गुरुङले अनुसन्धान गर्न प्रहरी चौकी सौरपानीमा साउन १० गते निवेदन दिएको र साउन ११ गते जिल्ला प्रहरी कार्यालय तथा मातहतको इलाका प्रहरी कार्यालय जौबारी र गोरखा अस्पतालको बिशेषज्ञ सहितको चिकित्सक टोलीहरुले मृत्तक रनमाया गुरुङको शव उत्खनन गरी आवश्यक परिक्षणका लागि संघिय राजधानीको टिचिङ अस्पताल पठाइएको सूचना अधिकारी श्रेष्ठले जानकारी दिए ।
लाश पोष्टमार्टमको लागि फरेन्सिक मेडिसिन विभाग महाराजगंज काठमाडौंबाट रिर्पोट आउन अझै २ साता लाग्न सक्ने जिल्ला प्रहरी कार्यालय गोरखाका प्रहरी प्रमुख प्रहरी उपरिक्षक बासुदेव पाठकले बताए । शवको उत्खनन गरेर राजधानी पठाईएको भएता पनि उनको श्रीमानलाई भने प्रहरीले नियन्त्रणमा नलिएर निगरानीमा राखेको उनले बताए ।