गोरखा । ट्राफिक प्रहरी कार्यालय गोरखाले १ वर्षमा ८५ लाख ७१ हजार राजस्व उठाएको छ ।
२०८० साउनपछिको १ वर्षमा ट्राफिक जरिवानाबाट ८५ लाख ७१ हजार राजस्व सङ्कलन गरिएको जिल्ला ट्राफिक प्रहरी प्रमुख शिवप्रसाद पाठकले बताए ।
प्रमुख पाठकका अनुसार यो बर्ष कुल १० हजार ४७४ साना ठुला सवारी साधानहरु कारवाहीमा परेका थिए । कारवाहीमा परेका मध्ये सबैभन्दा धेरै भने साना सवारी त्यो पनि दुई पाग्रो भएको उनले जानकारी दिए ।
कारवाहीमा ४ हजार ९१८ वटा मोटरसाईकल तथा स्कुट, २ हजार ३७१ वटा कार–जिप तथा १ हजार ६३७ वटा ट्रक तथा ट्रिपर कारवाहीमा परेको कार्यालयले जानकारी दिएको छ ।
कार्यालयको तथ्यांक अनुसार ८६४ वटा बस, ६६६ वटा ट्याक्टर र अन्य १८ सवारी साधान कारवाहीमा परेका थिए ।
गत आर्थिक वर्षमा १० हजार ३०० सवारी कारवाहीमा पर्दा ट्राफिक प्रहरीले ७६ लाख ३० हजार राजश्व सङ्कलन गरेको थियो । आर्थिक वर्ष २०७९–०८० को तुलनामा ट्राफिक जरिवाना बापत सङ्कलन गरिने राजस्व रकम बढेको छ ।
