गोरखा । गोरखा प्रहरीले महिलालाई ठगी गरेको आरोपमा सदरमुकामबाट १ जना पुरुषलाई पक्राउ गरेको छ । प्रहरीले गोरखा नगरपालिका–११ को बाह्रकिलो भन्ने स्थानबाट ३९ बर्षिय पिटर गुरुङलाई पक्राउ गरेको हो ।
जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी रमेशकुमार श्रेष्ठका अनुसार गुरुङले एक सुन पसलमा गएको फागनु ६ गते सुन राखेर ३ लाख ५० हजार निकालेको र सुन धनीलाई ३ लाख मात्र दिएका थिए ।
गोरखा नगरपालिका–१२ को दशकिलो भन्ने स्थानम बस्ने जमुना कुमालको सुन राखेर ठगी गरेका गुरुङले पुनः सुन निकाल्ने भन्दै कुमालबाट २ लाख रुपैयाँ लिएकोमा सुन ननिकालीकन उक्त रकम समेत ठगी गरेको भन्ने उजुरीमा उनलाई प्रहरीले पक्राउ गरको सूचना अधिकारी श्रेष्ठले जानकारी दिए ।
ठगी गर्नकै लागि कुमाललाई सुन निकाल्नु पर्यो भन्दै धाक धम्की दिएर उक्त रकम लिएको र सुन समेत फिर्ता नगरेपछी कुमालले प्रहरीमा निवेदन दर्ता गराएका थिए ।
प्रहरीले गुरुङलाई गएको असार २९ गते पक्राउ गरी ३० गते ठगी सम्बन्धी कसूर शिर्षकमा मुद्वा दर्ता गरी गोरखा जिल्ला अदालतबाट अनुसन्धानका लागि म्याद थप गरीएको प्रहरीले जनाएको छ । पक्राउ परेका गुरुङलाई प्रहरीको हिरासतमा राखेर अनुसन्धान सुरु गरिएको पनि सूचना अधिकारी रमेशकुमार श्रेष्ठले जानकारी दिए ।