गोरखा समाचारदाता
काठमाण्डौं – आज (बुधबार) बारा र पर्साका ३ जनामा कोरोना संक्रमण पुष्टि भएको छ ।
टेकुस्थित केन्द्रिय प्रयोगशालामा गरिएको पिसीआर परीक्षणमा बाराका २ र पर्साका १ जनामा कोरोना संक्रमण भेटिएको हो । यो सँगै नेपालमा कोरोना संक्रमण हुनेको संख्या ५७ पुगेको छ ।
बाराको सिमरा अस्थायी उपचार केन्द्रको आइसोलेसनमा राखिएका २ जनामा कोरोना संक्रमण भेटिएको हो । संक्रमित हुनेमा जितपुर–सिमरा उपमहानगरपालिका ७ का ४३ बर्षिय पुरुष र सिम्रौनगढ नगरपालिका ४ का ३१ बर्षिय पुरुष रहेका छन ।
त्यस्तै टेकुमै गरिएको परीक्षणमा वीरगञ्ज २ छपकैयाका ४६ वर्षीय पुरुषमा पनि कोरोना संक्रमण देखिएको छ । ३ जना यसअघि वीरगन्ज १६ स्थित इनरुवाका कोरोना संक्रमित व्यक्तिसँगै दिल्लीको मुस्लिम धार्मिक सम्मेलनबाट फर्किएका थिए ।
संक्रमण पुष्टि भएका ३ जनालाई नारायणी अस्पताल पठाईएको छ । यसअघि भारतवाटै फर्केका रौतहटका २ जना पुरुषमा मंगलबार संक्रमण देखिएको थियो ।
पछिल्लो घटनासहित प्रदेश २ मा कोरोना भाइरस सङ्क्रमितको संख्या १२ पुगेको छ भने ४ जना उपचारपछि घर फर्किसकेका छन् । संक्रमितहरू मध्ये ३ जना पर्सा, २ जना बारा, २ जना रौतहट र १ जना सर्लाहीका हुन् ।
