गोरखा समाचारदाता
काठमाण्डौं – यो वर्षको इण्डियन प्रिमियर लिग (आइपिएल) टी ट्वान्टी क्रिकेट प्रतियोगिता अनिश्चितकालका लागि स्थगित भएको छ ।
भारतमा कोरोना भाइरसविरुद्ध लड्न लकडाउनको अवधि बढाइएसँगै अप्रिल १५ देखि हुने भनिएको आइपिएल अनिश्चितकालका लागि स्थगित भएको हो ।
भारतीय क्रिकेट बोर्ड ‘बिसिसिआई’ ले आइपिएल स्थगित गरिएको जानकारी सबै फ्रेन्चाइज टिमलाई दिएको हो । नयाँ आईपीएल कहिले हुने भन्ने ‘बिसिसिआई’ ले स्पष्ट पारेको छैन ।
बिसिसिआईका अध्यक्ष सौरभ गांगुलीले संकट झेलेका बेला खेल प्राथमिकतामा नरहने बताउदै आएका छन । बिसीसीआईले सेप्टेम्बर र नोभेम्बरमा खेल गर्न सकिने बताएको छ ।
तर सो समयमा टि ट्वान्टी विश्वकप हुने भएकाले खेल गर्न सम्भव नहुने देखिएको छ । भारतमा अहिलेसम्म १० हजारभन्दा बढीमा कोरोनाको संक्रमण देखिएको छ । ३७७ को ज्यान गइसकेको छ ।
आईपीएलको १३ औं संस्करण सुरुमा मार्च २९ देखि मे २४ सम्म हुने तय थियो । पछि त्यसलाई अप्रिल १५मा सारिएको थियो ।
