गोरखा समाचारदाता
गोरखा – गोरखाको उत्तरी क्षेत्रमा सिकार खेल्न गएका १ जनाको भिरबाट लडेर ज्यान गएको छ ।
जिल्लाको चुमनुब्री गाउँपालिकामा सिकार खेल्न गएका मध्ये १ जनाको भिरबाट लडेर ज्यान गएको हो ।
प्राप्त घटना विवरण अनुसार चैत्र २६ गते ५ जना साथीहरु संग सिकार खेल्न गएका चुमनुब्री गाउँपालिकाको ३ देवल बस्ने बर्ष ३० कान्छा गुरुङको कुरुबुण्डो जंगलको भिरबाट लडेर ज्यान गएको जिल्ला प्रहरी कार्यालय गोरखाले जानकारी दिएको छ ।
चुमनुब्री गाउँपालिका ३ देवलकै ५० वर्षका नुर्वु गुरुङ, ४० बर्षका भुजुङ गुरुङ, २२ बर्षका दिपक गुरुङ र ३० बर्षका सुर्य गुरुङ संग सिकारका लागि गएका उनको चैत्र ३० गते भिरबाट लडेर ज्यान गएको भन्दै बाँकीसाथीहरु घर फर्किएका थिए ।
मनास्लु संरक्षण क्षेत्र आयोजना भित्र पर्ने उत्त स्थानमा सिकार गर्न प्रतिबन्ध छ । तर लुकीछिपी साथीहरु संग कुरुबुण्डो जंगलमा पुगेका उनको सिकार गर्ने क्रममा लडेर ज्यान गएको संगै सिकार गर्न गएका सुर्य गुरुङले बताए ।
साथीको ज्यान गए पछि बैशाख १ गते फर्किएका उनीहरुले घरमा गएर भिरबाट लडेर ज्यान गएको जानकारी दिएका थिए । ज्यान गएका कान्छा गुरुङको परिवारजनले सिर्दीबासको फिलिम प्रहरी चौकीमा खबर गरे पछि घटनाको बिषयमा जानकारी प्राप्त भएको जिल्ला प्रहरी कार्यालय गोरखामा प्रहरी उरिक्षक ओमप्रसाद अधिकारीले बताए ।
सिकार खेल्न गएका सबैलाई प्रहरीले नियन्त्रणमा लिएर अनुसन्धान थालेको प्रदेश प्रहरी कार्यालयका सूचना अधिकारीले बताए । गुरुङको हत्या भएको आशंकामा ४ जना साथीहरुलाई नियन्त्रणमा लिएर अनुसन्धान थालिएको हो ।
