गोरखा समाचारदाता
काठमाण्डौं – सर्वोच्च अदालतले कोरोना संक्रमण महामारीप्रति सावधानी अपनाउँदै देशैभरका अदालतलाई २४ बुँदे निर्देशन जारी गरेको छ ।
अदालतले रुघाखोकी, ज्वरो वा कुनै संक्रामक रोगका लक्षण देखिएका वा त्यस प्रकारको शंका गर्नुपर्ने अवस्थामा कसैलाई पनि अदालत भित्र प्रवेश नगराउने सहितका निर्देशन जारी गरेको हो ।
सर्वोच्चले संक्रमणको शंका लागेका न्यायाधीश, कर्मचारी, कानून व्यवसायी, प्रहरी तथा अभियुक्त कसैलाई पनि अदालतभित्र प्रवेश नगराउन निर्देशन दिएको हो ।
महामारीको अवस्था कायम रहेसम्म न्यायाधीश तथा इजलास अधिकृत लगायतले अनिवार्य रुपमा मास्क लगाउने व्यवस्था गर्नुपर्ने, संयुक्त इजलासमा बस्ने न्यायाधीशहरु बीचको दुरी एकमिटर भन्दा बढी कायम राख्नुपर्ने र अदालतका सवै सरोकारवाला मानिसहरुबीचको दूरी कम्तिमा एक मिटर कायम गर्नुपर्ने निर्देशनमा उल्लेख छ ।
अदालतले इन्टरनेटबाट गर्न सकिने कामहरू आफू रहेको ठाउँबाटै गर्ने कार्यलाई निरन्तरता दिन पनि भनेको छ ।
कानून व्यवसायीले स्वयं इजलासमा उपस्थित नभई ईमेल वा सम्भव भए भिडियो कन्फरेन्सका माध्यमबाट पनि वहस गर्नसक्ने प्रवन्ध मिलाउन सर्वोच्चको निर्देशनमा भनिएको छ ।
